Гісторыя Сацыялістычнай Савецкай Рэспублікі Літвы і Беларусі ў падручніках і вучэбных дапаможніках Рэспублікі Беларусь

Abstract

Гісторыя Сацыялістычнай Савецкай Рэспублікі Літвы і Беларусі, або Літоўска-Беларускай ССР, як яна традыцыйна, але з юрыдычнага пункту гледжання недакладна называецца ў беларускай навуковай літаратуры па праблемах нацыянальнай дзяржаўнасці, як правіла, не вылучаецца ў асобную даследчыцкую тэму. У падручніках і розных дапаможніках для сярэдніх школ і ВНУ яна звычайна змяшчаецца ў двух параграфах, у якіх асвятляюцца абвяшчэнне ССРБ і польска-савецкая вайна, хоць незайздросны лес гэтага палітычнага ўтварэння мае прамое дачыненне да станаўлення не толькі беларускай, але і літоўскай дзяржаўнасці. Вывучэнне гісторыі Сацыялістычнай Савецкай Рэспублікі Літвы і Беларусі дапамагае вучням і студэнтам авалодаць перыядызацыяй нацыянальна-дзяржаўнага будаўніцтва і больш глыбока зразумець характар нацыянальнай палітыкі Савецкай улады ў дачыненні да Беларусі. У гэтым артыкуле пры гістарыяграфічным аналізе матэрыялаў падручнікаў і дапаможнікаў для сярэдняй школы і ВНУ будуць выкарыстоўвацца як традыцыйная назва — Літоўска-Беларуская ССР, так і юрыдычна правільная — Сацыялістычная Савецкая Рэспубліка Літвы і Беларусі (ЛітБел).